من حسنى مبارك الى شعب مصر

من طرف **abo_holaa** الأربعاء 27 مايو 2009, 9:05 am

من حسني مبارك .. إلى شعب مصر

شعر : أحمد فؤاد نجم

ياشعبي حبيبي ياروحي يابيبي ياحاطك في جيبي يابن الحلال

ياشعبي ياشاطر ياجابر خواطر ياساكن مقابر وصابر وعال

ياواكل سمومك يابايع هدومك ياحامل همومك وشايل جبال

ياشعبي اللي نايم وسارح وهايم وفي الفقر عايم وحاله ده حال

احبك محشش مفرفش مطنش ودايخ مدروخ واخر انسطال

احبك مكبر دماغك مخدر ممشي امورك كده باتكال

واحب اللي ينصب واحب اللي يكدب واحب اللي ينهب ويسرق تلال

واحب اللي شايف وعارف وخايف وبالع لسانه وكاتم ماقال

واحب اللي قافل عيونه المغفل واحب البهايم واحب البغال

واحب اللي راضي واحب اللي فاضي واحب اللي عايز يربي العيال

واحب اللي يائس واحب اللي بائس واحب اللي محبط وشايف محال

واحبك تسافر وتبعد تهاجر وتبعت فلوسك دولار او ريال

واحبك تطبل تهلل تهبل عشان مطش كوره وفيلم ومقال

واحبك تأيد تعضض تمجد توافق تنافق وتلحس نعال

تحضر نشادر تجمع كوادر تلمع تقمع تظبط مجال

لكن لو تفكر تخطط تقرر تشغلي مخك وتفتح جدال

وتبدأ تشاكل وتعمل مشاكل وتنكش مسائل وتسأل سؤال

وعايز تنور وعايز تطور وتعمللي روحك مفرد رجال

ساعتها حجيبك لايمكن اسيبك وراح تبقى عبره وتصبح مثال

حبهدل جنابك وأذل اللي جابك وحيكون عذابك ده فوق الاحتمال

وامرمط سعادتك واهزأ سيادتك واخلي كرامتك في حالة هزال

وتلبس قضيه وتصبح رزيه وباقي حياتك تعيش في انعزال

حتقبل ححبك حترفض حلبك حتطلع حتنزل حجيبلك جمااااال

من طرف white heart الخميس 28 مايو 2009, 12:42 pm

عليا النعمة هتودينا في داهية و تغرقنا Laughing

من طرف **Goda** الجمعة 29 مايو 2009, 9:56 am

حقيقة بيعيشها الشعب المسكين ولكن السبب مش مبارك بس السبب كل ظالم مستبد حتى من الشعب نفسه لان مبارك والحكومه مصريين برده يعنى كل مننا فينا مفيش استعمار وربنا يسترها

من طرف Baby dream الجمعة 29 مايو 2009, 12:48 pm

ياريتها ترسى على داهيه واحده Embarassed

من حسنى مبارك الى شعب مصر

من حسنى مبارك الى شعب مصر

رد: من حسنى مبارك الى شعب مصر

رد: من حسنى مبارك الى شعب مصر

رد: من حسنى مبارك الى شعب مصر